✍ନିବେଦିତା ମହାନ୍ତି
Writer | U Writer
ଫାଲଗୁନ ମାସର କୃଷ୍ଣ ଚତୁର୍ଦ୍ଦଶୀ
ଅଟଇ ଯେ ଶିବରାତ୍ରି ,
ମହାଦେବଙ୍କର ହୁଅଇ ଅର୍ଚ୍ଚନା
ଶୈବପିଠେ ଭିଡ ଯାତ୍ରୀ ।
ଶିବରାତ୍ରି ବ୍ରତ ସର୍ବଶ୍ରେଷ୍ଠ ଅଟେ
ସର୍ବକାମପ୍ରଦ ପୁଣ୍ୟ ,
ଯେଉଁ ନର କରେ ଏହି ବ୍ରତ ତା'ର
ମନସ୍କାମ ହୁଏ ପୂର୍ଣ୍ଣ ।
ଏହି ଦିବସରେ ହର ପାର୍ବତୀଙ୍କ
ହୋଇଥିଲା ପରିଣୟ,
କିଏ କହେ ପୁଣି ଏ ଦିନ ଶଙ୍କର
କରିଲେ ତାଣ୍ଡବ ନୃତ୍ୟ ।
ଆଉ କେହି କୁହେ ପ୍ରକଟ ହୋଇଛି
ଏହିଦିନ ଶିବଲିଙ୍ଗ ,
ଭିନ୍ନ ପୁରାଣରେ ଲିପିବଦ୍ଧ ହୋଇ
ରହିଛି ଭିନ୍ନ ପ୍ରସଙ୍ଗ ।
ଏ ଦିନ ଭକତ ଉପବାସ ରହି
ସନ୍ଧ୍ୟାକୁ ଯାଏ ମନ୍ଦିର ,
ମନ୍ଦିର ପ୍ରIଙ୍ଗଣେ ଦୀପ ଜାଳିଥାଏ
ରହି ପୁଣି ଉଜାଗର ।
ଚାରିଟି ପ୍ରହର ପ୍ରଦୀପ ଜାଳନ୍ତି
ତୁଣ୍ଡରେ ଜପନ୍ତି ନାମ,
କେହି କେହି ପୁଣି ମୌନ ରୁହନ୍ତି
ପ୍ରଭୁଙ୍କୁ କରନ୍ତି ଧ୍ୟାନ ।
ଫୁଲ ଫଳ ବେଲ ପତର ଚଢାଇ
କରିଥାନ୍ତି ଉପାସନା,
ଭଜନ କୀର୍ତ୍ତନ କରନ୍ତି ଶ୍ରଦ୍ଧାରେ
ଶୁଦ୍ଧ ରଖନ୍ତି ଭାବନା ।
ଶିବଲିଙ୍ଗକୁ ପୂଜା କରାଯାଏ
ପଞ୍ଚାକ୍ଷର ମନ୍ତ୍ର ଗାଇ,
ପ୍ରତି ପ୍ରହରରେ ହୁଏ ଅଭିଷେକ
ଦୁଧ,ଦହି,ମହୁ ଦେଇ ।
ଚତୁର୍ଥ ପ୍ରହରେ ଉଠେ ମହାଦୀପ
ମନ୍ଦିର ଚୂଡାଦେଶକୁ,
ଅଜ୍ଞାନରୂପକ ଅନ୍ଧକାରକୁ ଯେ
ଦୂର ଜାଣ କରିବାକୁ ।
ମହାଦୀପ ଦେଖି ବିହ୍ଵଳ ହୁଅନ୍ତି
ପବିତ୍ର ହୁଅଇ ମନ,
ପର ଦିନ ବ୍ରତ ଭାଙ୍ଗି କରିଥାନ୍ତି
ଅନ୍ନ ଓ ଜଳ ଗ୍ରହଣ ।
ଜୀବନର ଅନ୍ଧକାର ଦୂର କରେ
ପବିତ୍ର ଜାଗର ଜ୍ୟୋତି ,
ଉଜାଗର ରହି ଜାଗର ଜାଳି ମୁଁ
ହେବି ତ ସୌଭାଗ୍ୟବତୀ ।
ଜୟ ଶିବ ଶମ୍ଭୁ ଜୟ ଭୋଳାନାଥ
ନୀଳକଣ୍ଠ ମହେଶ୍ୱର ,
ପ୍ରଣାମ କରୁଛି ଶରଣ ଯାଉଛି
ଭବରୁ କର ହେ ପାର ।
Tags:
#ଓଡିଆ #କବିତା
#UWriter
0 Comments
📩 Give Your Precious Comments before You Leave. (Put your Name before comment.)